တပ်မတော်ကာကွယ်ရေး ဦးစီးချုပ်ကို လှောင်ပြောင်၊ အသရေဖျက်သည်ဟု စွပ်စွဲခံရသူ မချောစန္ဒီထွန်းကို မအူပင်တရားရုံးတွင် ရုံးထုတ်

တပ်မတော်ကာကွယ်ရေး ဦးစီးချုပ်ကို လှောင်ပြောင်သည်ဟု စွပ်စွဲခံရကာ
အီလက်ထရောနစ် ဆက်သွယ်ဆောင်ရွက်ရေး ဥပဒေ ပုဒ်မ ၆၆(ဃ)ဖြင့်
တရားစွဲဆို ခံထားရသည့် မချောစန္ဒီထွန်းကို မအူပင်တရားရုံးတွင် အောက်တိုဘာ
၂၇ ရက်က ရုံးထုတ်စစ်ဆေးခဲ့ပြီး အသရေဖျက်မှု ပုဒ်မ ၅၀၀ ကိုပါ ထပ်တိုး စွဲဆိုလိုက်ကြောင်း
 သတင်းရရှိသည်။

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ၀တ်ဆင်ထား
သော ယူနီဖောင်းသည် ဒေါ်အောင်ဆန်းစုကြည် ၀တ်ဆင်ထားသည့်
ထဘီအရောင်နှင့် ဆင်တူသည်ဟု လူမှုကွန်ရက်စာမျက်နှာ (Facebook)ပေါ်တွင်
ရေးသား ဖော်ပြခဲ့ခြင်းကြောင့် မချောစန္ဒီထွန်းကို တပ်မတော်ကိုယ်စား ပုသိမ်
အခြေစိုက် အနောက်တောင်တိုင်း စစ်ဌာနချုပ်မှ ပထမတန်း စစ်ရေးဦးစီးအရာရှိ
ဒုတိယဗိုလ်မှူးကြီး ကျော်ထင်က တရားလိုပြုလုပ် တရားစွဲဆိုထားခြင်း ဖြစ်ပြီး
ဒုတိယမြောက်ရုံးချိန်တွင် အသရေဖျက်မှုကိုပါ ထပ်တိုးစွဲဆိုခဲ့ခြင်း ဖြစ်သည်။

မအူပင်နည်းပညာ တက္ကသိုလ်မှ B.Tech(EC) ဖြင့် ဘွဲ့ရထားသူ
မချောစန္ဒီထွန်းသည် မအူပင်ခရိုင် ကျောင်းသား သမဂ္ဂအဖွဲ့ဝင်ဟောင်း တစ်ဦးဖြစ်ပြီး
ဖေဖော်ဝါရီလအတွင်းက ပေါ်ပေါက်ခဲ့သည့် ကျောင်းသားသပိတ် စစ်ကြောင်းတွင်
လိုက်ပါ၍ အမျိုးသားပညာရေး ဥပဒေကို ဆန့်ကျင်ကန့်ကွက်ခဲ့သူ တစ်ဦးလည်း
ဖြစ်ကြောင်း၊ ယင်းနောက်ပိုင်းတွင် ကျောင်းသားသမဂ္ဂမှ နုတ်ထွက်၍ မအူပင်မြို့နယ်
NLD ပါတီသို့ ၀င်ရောက်ကာ ပါတီအောင်နိုင်ရေး လုပ်ငန်းများ ၀ိုင်းဝန်းကူညီ
ဆောင်ရွက်နေသူလည်း ဖြစ်ကြောင်း သိရသည်။

သတင်း - ဇော်မင်းထွန်း
Photo - နေရောင်နီ
The Ladies News Journal
https://www.facebook.com/News.TheLadies

.........................