မဲဆောက်မြို့တွင် မြန်မာနိုင်ငံသား အချင်းချင်း သတ်ဖြတ်ပြီး မြဝတီဘက် ထွက်ပြေး လာသူများအား ဖမ်းဆီးရမိ

ဓါတ်ပုံ - Police Myawaddy (FB)

မဲဆောက် နိုဝင်ဘာ ၂

ထိုင်းနိုင်ငံ မဲဆောက်မြို့တွင် မြန်မာနိုင်ငံသားအချင်းချင်းအတူတူ သောက်စားကြပြီး အချင်းချင်းစကားများကာ လူသတ်ထွက်ပြေးလာသော ညီအစ်ကိုနှစ်ဦးအား မြဝတီမြို့၌ ဖမ်းဆီးနိုင်ခဲ့သည်။

ဖြစ်စဉ်မှာ နိုဝင်ဘာ ၁ ရက်တွင် မကြည်ဝင်းသည် ထိုင်းနိုင်ငံ မဲဆောက်မြို့ စအိုကျေးရွာရှိ နေအိမ်တွင်ရှိနေစဉ် ခင်ပွန်းဖြစ်သူ ထွန်းနိုင်ဦး(၃၈)နှစ်မှာ ဓားဖြင့်အထိုးခံရ၍ သေဆုံးနေကြောင်း ဖုန်းဆက်အကြောင်းကြားလာသဖြင့် ခင်ပွန်းဖြစ်သူအလုပ်လုပ်ကိုင်သည့် မဲဆောက်မြို့တွင်းရှိ ဆောက်လုပ်ရေး လုပ်ငန်းခွင်သို့ လာရောက်ကြည့်ရှုရာ ခင်ပွန်းဖြစ်သူမှာ ဆောက်လုပ်ရေးစခန်း အရှေ့ မြေကွက်လပ်၌ ဒဏ်ရာများဖြင့် သေဆုံးနေသည်ကိုတွေ့ရှိခဲ့ရပြီး အတူနေထိုင်သည့် စိုးမင်းလတ်(ခ)ကုလားနှင့် ကျော်ဇင်ထွေး(ခ)ကျွဲလေးတို့က ဓားဖြင့်ထိုး၊ တုတ်ဖြင့်ရိုက်နှက်ပြီး ထွက်ပြေးသွားကြောင်း စုံစမ်းသိရှိရသဖြင့် မကြည်ဝင်းက မဲဆောက်ရဲစခန်းသို့တရားလိုပြုလုပ်တိုင်ကြားခဲ့သည်။ ထိုင်း ရဲတပ်ဖွဲ့ဝင်များက စုံစမ်းရှာဖွေကြရာ မြန်မာနိုင်ငံဘက်သို့ ထွက်ပြေးသွားကြောင်း သိရှိရသဖြင့် နိုဝင်ဘာ ၂ ရက်တွင် မြဝတီမြို့မရဲစခန်းသို့ မိမိ၏ခင်ပွန်းအားသတ်၍ ထွက်ပြေးသွားသူများအား ဖမ်းဆီးအရေးယူပေးနိုင်ပါရန် ဆက်လက်၍ အမှုဖွင့်တိုင်ကြားခဲ့သည်။

တိုင်ချက်ဖွင့်ပြီးသည်နှင့်တစ်ပြိုင်နက် မြဝတီမြို့မရဲစခန်းမှ ဒုရဲမှူးကိုကိုနိုင်၊ နယ်ထိန်းခေါင်းဆောင် ဒုရဲအုပ်မြတ်စိုးလင်းပါ ပူးပေါင်းအဖွဲ့တို့နှင့်အတူ မြို့အတွင်း၊ အပြင် ပိုက်စိပ်တိုက်ရှာဖွေခဲ့ကြရာ မြဝတီမြို့ မင်းလက်ပံကျေးရွာ တွင် နိုဝင်ဘာ ၂ ရက် နံနက် ၁၁ နာရီခွဲတွင် ဖမ်းဆီးနိုင်ခဲ့ပြီး စစ်ဆေး မေးမြန်းခဲ့ရာ အရက်သေစာသောက်စားမူးယစ်ပြီး အချင်းချင်းစကားများ ငြင်းခုံရာမှ ဒေါသအလျောက် လူသတ်မှုကျူးလွန်မိခဲ့ကြောင်း ဝန်ခံထွက်ဆိုခဲ့ရာ စိုးမင်းလတ်(ခ)ကုလား(၃၂)နှစ်နှင့် ကျော်ဇင်ထွေး(ခ)ကျွဲလေး(၂၉)နှစ် ဆားမလောက်ကျေးရွာ ညောင်တုန်းမြို့နယ် ဧရာဝတီတိုင်းဒေသကြီးနေထိုင်သူ ညီအစ်ကိုနှစ်ဦးအား မြဝတီမြို့မရဲစခန်းက အမှုဖွင့်အရေးယူထားကြောင်း သိရသည်။

တင်ဝင်းလှိုင်(ကော့ကရိတ်)
The Mirror Daily
https://www.facebook.com/TheMirrorDaily

........................................................