ဆီးရီးယားစစ်ပွဲ၏ ရုရှားစစ်လေယာဉ်များ၌ ဝေဟင်ပစ်လက်နက် စနစ်များ ရုရှားတပ်ဆင်

မော်စကို ၊ ၁-၁၂-၂၀၁၅

တူရကီလေတပ်က ရုရှား ဗုံးကြဲလေယာဉ် တစ်စင်းကို ဆီးရီးယားနယ်စပ် အနီး နိုဝင်ဘာ ၂၄ ရက်တွင် ပစ်ချခဲ့ပြီးနောက် ဆီးရီးယား နိုင်ငံ၌ လေကြောင်း စစ်ဆင်ရေးများ ပြုလုပ် နေကြသည့် ရုရှား စစ်လေယာဉ်များသည် ကိုယ့်ကိုယ်ကိုယ် ကာကွယ်ရေး အတွက် ဝေဟင်ပစ် လက်နက်များ တပ်ဆင် ထားလိုက်ပြီ ဖြစ်ကြောင်း ယမန်နေ့တွင် သတင်းများ၌ ဖော်ပြခဲ့သည်။

ဆီးရီးယား အခြေစိုက် အစ္စလာမ္မစ်နိုင်ငံ အကြမ်းဖက်အုပ်စု ISIS ကို လေကြောင်း ထိုးစစ်များ ဆင်နွှဲနေသည့် ရုရှားလေတပ် Su-24 တိုက်လေယာဉ် များတွင် ဝေဟင်မှ ဝေဟင်ပစ်ဒုံးကျည် လက်နက်များကို ပထမဆုံးအကြိမ် အဖြစ် တပ်ဆင် ပေးလိုက်ပြီ ဖြစ်ကြောင်း ရုရှားလေတပ်က သတင်း ထုတ်ပြန်ခဲ့သည်။

Su-34s တိုက်လေယာဉ် များတွင် တပ်ဆင်ထားသော ဝေဟင်မှ ဝေဟင်ပစ် ဒုံးလက်နက် များသည် ၃၇ မိုင် အကွာအဝေးတွင် တည်ရှိသည့် ဝေဟင်ပစ်မှတ် များကို ဖျက်ဆီးနိုင်ကြောင်း ရုရှားလေတပ် ပြောရေးဆိုခွင့် ရှိသူ တစ်ဦးက ပြောကြားသည်။

နိုဝင်ဘာ ၂၄ ရက်က ပစ်ချခံ ခဲ့ရသော ရုရှား လေယာဉ်သည် ထောက်လှမ်းရေး သတင်း အချက်အလက် များအရ တူရကီ လေပိုင်နက်ကို ချိုးဖောက် ခဲ့ကြောင်း မြောက်အတ္တလန္တိတ် စာချုပ်အဖွဲ့ (နေတိုး) ဆိုင်ရာ အမေရိကန် သံအမတ်က ပြောကြား ခဲ့ပြီးနောက် ရုရှားနိုင်ငံက ဆီးရီးယား နိုင်ငံရှိ တိုက်လေယာဉ် များကို ဝေဟင်ပစ် လက်နက်များ တပ်ဆင်ပေး လိုက်ခြင်းဖြစ်သည်။

ရုရှားလေယာဉ်ကို ပစ်ချခဲ့မှုနှင့် ပတ်သက်၍ မိမိတို့အနေဖြင့် တောင်းပန်ရန် မလိုကြောင်း၊ နိုင်ငံတော်၏ အချုပ်အခြာ ပိုင်နက်ကို ကာကွယ်ရေး သည် မိမိတို့၏ တာဝန် ဖြစ်ကြောင်း တူရကီဝန်ကြီးချုပ် က ယမန်နေ့တွင် သတင်းထောက် များကို ပြောကြားခဲ့သည် ဟုသိရသည်။

#PyiChitThar

........................................................